Bacalhau de la bendímia

Ua de las caratelísticas de l quemido de l tiempo an que me criei, na aldé, ye que todo tenie l sou tiempo, i fuora desso fazie-se gana de las cousas para quando las houbisse. 
Por to l anho solo habie l que se cunserbaba cunsante ls modos tradecionales, l sal ou l fumo, la çuça ou, até, l binagre, que nun habien inda chegado ls frigoríficos i las arcas para ancarambinar las cousas. Agora, yá se puode ancarambinar muita cousa para comer fuora de tiempo i, cuido you, l mais de las bezes sien perder l sou berdadeiro sabor. 
Assi i todo, nun deixa de haber ua cierta relaçon antre l que se come i l tiempo an que se come, porque quien naciu ne l campo nun cunsigue bibir fuora de ls ciclos de la natureza i a eilhes tamien associa sous sabores i l nacer de las cousas. Hai un bacalhau que se puode comer an qualquiera tiempo, mas que a mi me sabie subretodo na bendímia, i por esso le passei a chamar siempre Bacalhau de la Bendímia. Assa-se l bacalhau (nun cumben que seia mui gordo) nuas brasas i apuis, mal apenas se saca de l lume, scocha-se culas manos als cachicos para ua trabiessa. 
Ls cachicos ténen de ser al modo que se puoda comer un de cada beç sien tener que l partir, mas tamien sien ser tan pequeinho que mal dá para agarfiar. Cun esse bacalhau bota-se alho i pumientos assados, apuis se ambolbendo todo cun muito azeite. Esse prato, tan simples, queda cun un sabor mui agradable, sien ser pesado, assi antre caliente i friu yá al modo de l tiempo de la bendímia. Gusta-me tanto que ye un de ls pratos que purparo an mie casa quando tengo cumbidados a quien quiero oufrecer ua cousa mesmo buona. 
Talbeç a mi me saba siempre melhor que a eilhes, yá que la mie parte ten anguerdientes que la deilhes nun puode tener, mas que you nun çpenso: las lembráncias i ls cabeços a berdegar de binhas.

amadeujf@gmail.com
in:sendim.net