Zafio als Outarcas: Apuiar la Recuperaçon de l Património Eidificado

Por: António Preto Torrão
(colaborador do "Memórias...e outras coisas...") 

Yá que stamos a pouco mais d’ũa semana de las eleiçones pa la Junta de Freguesie ou Ounion de Freguesies i pa la Assembleia i Cámara Munecipal, ye mie oubrigaçon lhembrar i pedir ũa cousa als candidatos a outarcas de la mie tierra de nacéncia – Angueira, adonde daprendi a falar, purmeiro, an Mirandés, i, apuis, na eigreija i na scola, a falar i a screbir an Pertués – i de l miu cunceilho, ou seia, de Bumioso: deixai-bos dessas cousas de dar nas bistas i d’anchir ls uolhos, mas que nun antréssan a naide nin dan para nada.

Angueira: molino de las Trés Ruodas ou de ls Lucas. Oubrigado, Vítor Moreira, por me outorizar a publicar l retrato.

Botai-bos, mas ye, a fazer l que balga mesmo la pena pa las poboaçones i pa l cunceilho i, subretodo, pa l bien-star de las pessonas. Por eisemplo, aporbeitar bien l’auga de las anchenas d’eimbierno de ls três rius – Angueira, Maçanas i Sabor – i de ls ribeiros que neilhes ban a desaugar i apuiar la recuperaçon ou recustruçon de l património tradicional eidificado: çudas, molinos, casas de molineiro, casas de bibir de las pessonas d’antigamente, palombares al redor de las poboaçones i corriças q’hai pul termo i q’ampéçan, ou stan yá mesmo, a sbarrulhar-se.

Bien sei que a toda la gente le gusta amostrar obra que se beia. Mas, buona figura fai i, cumo tal, proua debe tener quien faga l que mais antressa a las pessonas i a las poboaçones i que son mais neçairas ne l cunceilho.

Subre la custruçon de represas d’auga i charcas i subre la reparaçon de las çudas i de las caliendras, screbi hai yá alguns dies. Bou hoije, aton, a screbir subre ls molinos i algũas casas de bibir d’Angueira: las casas de molinheiro, ne l termo i al lhado de ls molinos de las Trés Ruodas, de Terroso i de la Senhora, i antigas casas de bibir na poboaçon.

An Angueira, de ls siete molinos que dantes habie, réstran hoije inda quatro: l molino de la Senhora – adonde, nũa piedra de la parede, porriba de l banco de piedra, a la beira de l’antrada, se lei 1247 – i l molino de las Trés Ruodas ou de ls Lucas, que son ls mais antigos; i ls molinos de Terroso i de Telhado, este un cachico arriba de la Fuonte Santa. Trés deilhes ténen, al lhado, la casa de l molineiro, todas de dous pisos: la de l molino de las Trés Ruodas, a que solo le réstran las paredes de fuora; la de l molino de Terroso, inda cun buono telhado, paredes, puorta i jinelas; la de l molino de la Senhora, ũa guapa, buona i grande casa de bibir, apegada a outra pa las bestas, mas q’ampeça a amostrar seinhas d’abandono.

Angueira: casa de l molineiro de l molino de la Senhora i al lhado deilha, la loija de la cria cun palheiro pa las béstias

Antre las casas na poboaçon, afertunadamente, hai algũas yá recuperadas, mas, a muitas outras, hai que, quanto antes, botar-les la mano. Cuido que, quando ls duonhos nun quérgan ou nun puodan recuperá-las i anquanto la Cámara i la Junta nun apuiáren la sue recustruçon, melhor será que las póngan a la benda, a ber s’aparece quien querga botar-se a recustrui-las ou a recuperá-las. Doutro modo i se nada fur feito, mais die menos die, staran todas sbarulhadas, ne l chano i sin qualquiera préstimo, porbeito ou serbentie para naide.

Angueira: caleija an Saiago atrás de la casa de ls Raianos, adonde bibien ls Balazaros, tiu Albardeiro, tie Tarasca i outros

Nas cidades hai algũas casas de gente probezica que fázen parte de “ilhas” a que, an Angueira, le chamámos “caleijas”, adonde cunto haber oumenos nuobe: quatro ne l bairro de Sante Cristo i cinco ne l bairro de Saiago. Mas, nin todas las casas de las caleijas d’Angueira son de gente probe. Oumenos dues deilhas – ũa que queda antre las casas de l senhor Dioniç, de l tiu Antonho Carai, de la tie Beatriç Guerrilha i de l senhor Zé de la Moca i outra antre las casas de l tiu Chico Regino i de l senhor cabo Xabier, ambas a dues ne l bairro de Saiago – mais s’asparécen culs cundomínios cerrados de la gente fina de las cidades.

Angueira: caleija de la tie Janeira na parte de riba de l Lhargo de Saiago. Haberie eiqui casas de bibir doutras famílias?

Agora, la maior parte de las casas destas caleijas d’Angueira stan al abandono i ampéçan a amanaçar quedar, ou stan yá mesmo, an rúina: la de ls Casetos – adonde, antes de eimigráren, pa lhá desta família, bibírun las de l tiu Chapaça i de l tiu Cisnando i, apuis, la de l tiu Agrepino Albardeiro, l gaiteiro d’Angueira – i la de ls Galharitos, ambas a dues an Sante Cristo; la de ls Cristos, la de ls Pandeirelos, la de la tie Janeira i la de ls Balazaros, todas estas ne l bairro de Saiago. Ne l bairro de Sante Cristo, hai inda outras – adonde éran las casas de bibir de l tiu Zé Pitascas i de la tie Adozinda Cacaitas i, apuis, la sue filha, Sabel Cochinica, an que las casas stan a ser recuperadas puls filhos desta; i outra pul lhado de riba de la capielha de Sante Cristo, adonde bibien ls quinteiros de l tiu Arán i la de la tie Machaca, i qu’inda nun será deficel recuperar ambas a dues.

Cumo podeis ber puls retratos, ye ũa pena qu’estas i muitas outras casas de bibir, assi cumo tamien ls molinos i las casas de l molinheiro stéian ne l stado an q’hoije stan.

Angueira: caleija de ls Casetos an Sante Cristo, porriba de la Mediana, adonde bibírun tiu Cisnando i, apuis, tiu Agrepino

Bendo isto, hai ũa pergunta que nun me sal de la cabeça: haberá algũa rezon para ambriar mais de € 1 100 000 solo na custruçon de mais dous pabelhones multiusos ne l cunceilho – ye muito denheiro, mas beremos quanto custaran, pori mais, quando acabar la custruçon! – i qu’inda hai qu’eiquipar i, subretodo, que mantener todos ls anhos, para, apuis, por falta de gente, subretodo de mocidade, quedáren la maior parte de ls dies de l anho a las moscas? Ye que, mesmo que cada un deilhes seia outelizado ũa ou dues horas dun die por semana i treze dies por anho para feiras i fiestas, inda réstran trezientos dies de l anho sin qualquiera outelizaçon!

Bós que sodes pessonas anteligentes, cun uolhos de ber na cara i teneis la cabeça ne l lhugar que ye debido i que bos sirbe para mais cousas q’amostrar l peinado ou poner l chapéu, ora dezie-me alhá: nun bos parece que serie bien melhor que, an beç de luxos tan bizarros, la Cámara de Bumioso aplicasse esse denheiro pa reparar las çudas i ls molinos i/ou p’ajudar ls duonhos a reparar este i l restrante património eidificado q’hai an Angueira i nas outras poboaçones de l cunceilho?

A cuntinar assi cumo, até agora, ten sido, an beç d’atrair gente nuoba, nun staremos a ampuntar mais pessonas para fuora de l nuosso cunceilho i, assi, a ancaminá-lo pa la puorta de l semitério? Seia quien fur l outarca eileito, spero bien que nun tenga, pori, que fazer-le las bezes de cobeiro!

António Preto Torrão. Licenciado em Filosofia (Universidade do Porto)
DESE em Administração Escolar (ESE do Porto)
Mestre em Educação – Filosofia da Educação (Universidade do Minho)
Pós-graduado em Inspeção da Educação (Universidade de Aveiro)
Professor e Presidente Conselho Diretivo/Executivo
Orientador de Projetos do DESE em Administração Escolar (ESE do Porto)
Autor de livros e artigos sobre Administração Educativa
Formador Pessoal Docente e Diretores de AE/Escolas
Inspetor e Diretor de Serviços na Delegação Regional/Área Territorial do Norte da IGE/IGEC