𝐒𝐚𝐥𝐛𝐚𝐫 𝐥𝐚 𝐋𝐡𝐞́𝐧𝐠𝐮𝐚 𝐌𝐢𝐫𝐚𝐧𝐝𝐞𝐬𝐚 𝐝𝐞 𝐥 𝐩𝐞𝐥𝐢𝐠𝐫𝐨 𝐝𝐞 𝐦𝐮𝐨𝐫𝐭𝐞 𝐢 𝐚𝐧𝐠𝐫𝐚𝐧𝐝𝐞𝐜𝐞́-𝐥𝐚

 Bengo a falar-bos de l Purmeiro Cunceilho Giral pu la Lhéngua Mirandesa, que tenerá lhugar ne l próssimo die 27 de dezembre, a las 2h00 de la tarde, ne l Ouditório Munecipal.

Un studo académico cuncluiu que l Mirandés zaparecerá cumo lhéngua biba ne ls próssimos 30 anhos se nada de strourdinairo fur feito. La Lhéngua Mirandesa ye un strourdinairo recurso que mos fui deixado puls nuossos antrepassados, l produto de l'anteligéncia i de l conhecimiento dun pobo que l custruiu i l fizo medrar al lhargo de muitos seclos. Tenemos de ser dignos dessa hardança i todo fazer, nó solo para ampedir l sou zaparecimiento, mas tamien pa l spargir i l angrandecer. Serie un absurdo que na sociedade de l conhecimiento an que bibimos, deixássemos morrer la nuossa lhéngua. Acolhi, mui animada, l'eideia de la Cámara Municipal de Miranda de l Douro adoptar i amplementar ua stratégia que rebuolba la tendéncia pa l zaparecimiento de l Mirandés. Para isso, queremos ajuntar i ambulber todos ls parceiros relebantes, specialmente ls falantes, las anstituiçones culturales de la Tierra de Miranda, ls scritores, las anstituiçones d'ansino i, an giral, todos aqueilhes qu'anténdan que ténen algun cuntributo a dar, por modesto que seia, para salbarmos l mirandés anquanto lhéngua de comunicaçon i pa l'angrandecermos i dignificarmos. De seguida, tenemos l'ambiçon de fazer un Plano Stratégico pa la Lhéngua Mirandesa, cun ls cuntributos de todos, que sirba d’alheçace para ua Política pa la Lhéngua, de la Cámara Municipal. Cumo bai e decorrer l eibento: Pretendemos ua fuorte participaçon, nó solo cun la preséncia física, mas tamien cun apresentaçon de comunicaçones, i cumbidamos todos la fazé-las. Para esse eifeito, fazimos ua manada, meramente eisemplificatiba, de temas que poderien ser tratados nessas comunicaçones. Esses temas son einunciados mais an baixo, mas piedo-bos que me mandeis sugestones d'outros temas. Quien querga tamien puode apresentar comunicaçones subre outros temas que puodan serbir esse oubjetibo. Seran tamien bien-benidas essas apresentaçones. Çponibelizamos tamien la possibelidade de se podéren anscrebir para fazéren l'apresentaçon dessas comunicaçones. Essa anscriçon adelantrada nun ye oubrigatória, mas quien la fazir ajuda-mos a purparar l'ourganizaçon de l Purmeiro Cunceilho Giral i reserba yá l tiempo necessairo para fazer la sue apresentaçon. De qualquiera maneira, quien nun quejir fazer essa anscriçon adelantrada, siempre poderá pedir para fazer la sue apresentaçon até al momento de la própia rializaçon de l Cunceilho.

✍ Las anscriçones puoden ser feitas eiqui ou pul eimeil: cultura@cm-mdouro.pt

Cuntamos cun bós, a títalo anstitucional i andebidual, porque l Mirandés precisa de todos i de cada un de nós.

𝐿𝑎 𝑃𝑟𝑒𝑠𝑖𝑑𝑒𝑛𝑡𝑒 𝑑𝑒 𝑙𝑎 𝐶𝑎́𝑚𝑎𝑟𝑎,

𝐻𝑒𝑖𝑙𝑒𝑛𝑎 𝐵𝑎𝑟𝑟𝑖𝑙