Livros e Autores Transmontanos - Tiempo de las Cerejas

«Conceição Lopes ye ua boç nuoba na poesie mirandesa, porque chena de modernidade, que abre brechas por adonde puode salir l mofo que se mos ancundesou al lhargo de muitos anhos. La poesie reganha eiqui sue ounibersalidade, assente ne l pedamiego de l poeta i sue cundiçon de mulhier, que arrebenta ou solo se assoma an todos ls bersos, somos mulhieres i sabemos / de l delor, la perséncia scundida… que pide deixa-me hoije ser you flor / i querer-te sol ardiente i auga fresca…
Subre la lhéngua mirandesa, eilha mesma diç: L Mirandés siempre fizo parte de las mies bibenças i nesta altura puodo dezir que me stá na alma, i fui assi que hai pouco tiempo ampecei a screbir dun modo lhebe i çcuntraído.» 
SãoSendin, ye un pseudónimo de Maria da Conceição Gonçalves Lopes naciu an Auch, ua cidade de l sudoeste de França, l 23 de Dezembre de 1968, sítio adonde l francés parece que ye cantado (l’accent de Marseille). Ende bibiu até 1978, altura an que ben de beç pa la tierra de ourige de sous pais, i tierra de l sou coraçon, Sendin. Dende l sou pseudónimo cumpuosto de l sou nome (São) i de Sendin, screbido nas dues lhénguas de l’outora, l pertués i l mirandés, na sue bariadade sendinesa an que l lhibro stá screbido i por essa rezon nun ten –lh- an ampeço de palabra. An Sendin studa até al nono anho, acabando l ansino secundairo an Miranda de l Douro. An Bila Rial, na Ounibersidade de Trás ls Montes i Alto Douro (UTAD), forma-se an medecina beternária, nessa cidade se mantenendo a trabalhar ne l sou oufício.

Titulo: Tiempo de las Cerejas
Autor: SãoSendin
Editora: Zéfiro
Preço: 8,91€
Comprar online »»