(Colaborador do "Memórias...e outras coisas...")
NOTA: Este testo ye solo la purmeira antre outras partes que son la sue cuntinaçon. Pa quedar cumpleto, fáltan-le anton outras partes de testo i alguns retratos de l termo i de la poboaçon d’Angueira.
Todo mundo ancara i bei l que stá al sou redor de la sue jinela, cunsante la sue maneira de ber. Mas nien mesmo la sue maneira de ber ye siempre la mesma. Quando stá triste tende a ber las cousas mais negras; se stá alegre bei-las de forma mais agradable. Pa lhá disso, sien se dar de cuonta, tende a ber las suas cousas de modo mais faborable que las de ls outros.
Cumo se puode adabinar, la poboaçon d’Angueira, cumo outras mais, ten muita stória i l sou passado. Mas, temendo que, se nada fur feito, se perda ne l persente i nun tenga, pori, feturo, tenemos anton que fazer algo para qu’este nun le falte a esta poboaçon milenar. Esta ye, antre muitas outras, ũa forma de le dezir upa i le dar ũa mano pa que nun se muorra i, pul cuntrairo, pa que ganhe mais i nuoba bida…
Todos sabemos que, de quando an beç, hai que tornar a la tierra que mos biu nacer i mos ajudou a crecer, pa matar soudades i, alhá, passar uns dies. Mais que nun seia, que séian, oumenos, uns cachicos de tiempo. Podemos, assi, pa lhá de la poboaçon, tornar a ber i caminar pul sou termo: l ambiente cun las sues paisaiges, cabeços, balhes, prainos; piedras, fragas, peinhas i la begetaçon; tierras de cultibo, cortinas, huortas i lhameiros; la ribeira i ls ribeiros que neilha záugan; ls caminos i ancruzelhadas; lhargos, rues i caleijas; cruzeiros, curriças, molinos, casas de molineiro, çudas i caliendras; l casariu i todo l mais que, na poboaçon, mais perto ou mais loinje, la nuossa bista alcança i q’acumpanhou l nuosso crecimiento. Claro stá que, pa lhá de todo isto, son las pessonas q’alhá bíben que le dan bida.
Que buono ye tamien, ne l final de la primabera, ne l berano i ne l ampercípio de l outonho, caminar pulas selombras de ls caminos, pulas marges de la ribeira i bordas de ls ribeiros, para oubir ls paixaricos a cantar, sentir i respirar outra beç aqueilha frescura de l aire, l oudor de la begetaçon, buer auga fresca nas fuontes, deixar marabilhar ls uolhos a abistar i a perdéren-se nas paisaiges i na lhuç an redor.
Na semana de l die de Pertual, you, la mie Dulcineia i Luís, l nuosso filho mais nuobo, alhá fumos todos trés passar ũa semana an Angueira. Eiqui bos deixo alguns retratos, uns de cousas naturales i outros de marca houmana; uns recentes i outros yá cun seclos, milénios i até mesmo alguns cun melhones d’anhos.
Bamos anton ampeçar pula poboaçon, l casariu, las rues, ls lhargos. las caleijas i las poucas pessonas bielhas i rejistentes que, agora, cumo siempre, alhá cuntínan a morar, i outras regressadas doutros países de l’Ouropa para donde eimigrórun, i q’alhá habítan.
Mas tamien alhá tenemos algũas nobidades que podeis ber an alguns retratos. Bamos anton ampeçar por ũa amblemática, eicelente i requintada obra d’arte q’hai uns anhos q’alhá permanece i proba q’alhá stubimos. Bá, mas nun percisais de dar muitas buoltas al miolho p’adabinar quien fúrun ls/as outores/as ou patrocinadores/as destas “stalhaçones” tan anspiradas i de grande i cumoquiera ancumparable balor artístico!… Cumo stá bien de ber, só podien ser dues amportantes ampresas tan amigas de la populaçon, de la Tierra de Miranda i de muitas mais tierras de l Paíç – la EDP i la PT – que mos deixórun an Angueira estas ancumparables obras d’arte, tan marcantes i de tanto balor cultural i stético, que, cumo dízen an Angueira, “quédan tan bien eilhi cumo la gaita – la de foles, claro stá – na porcisson de las almas!…”
Mas, para que naide cuide ou me acuse, pori, de you star a aporbeitar i, se calha, a splorar tan grandes perciosidades, propongo que, por nuossa einiciatiba, las debólbamos i las póngamos al redor ou çpinduremos de la cerca de las mansones de ls persidentes de ls Cunseilhos d’Administraçon de la EDP i de la Altice!… A ber s’assi ls “probezicos,” amigos de l peito de l capital nacional i, arriba de todo, de l capital strangeiro, quédan an cundiciones de dáren bien al pedal a fabor de ls sous quaije lhimpos antresses i carreiras.
Si que, cumo bien sabemos, pa chubir na bida, hai que pedalar ũa buona bicicleta i cun muita gana! Simblo disso ye esta obra d’arte que la EDP oufereciu i s’ancontra a meio de la poboaçon, an lhugar bien bisible, mesmo al lhado de la sede de la Associaçon Cultural i Recreatiba d’Angueira, cerca de la Fuonte, eilhi antre l chafariç de l Pilo i l Lhargo de l Ronso.
Deilhes, ls que quegíren chubir un cachico mais na bida que pedálen na bicicleta al pa riba. Stou an crer que, cul dedo andicador i, an jeito acusador, spetado ne l aire, eilhes, birados para nós, mos diran: “Sous ambejosos!…”
Claro stá que, a quien yá muito chubiu na bida, bonda pedalar un cachico solo pa se mantener! Ls que se dan por sastifeitos i cúidan que yá les bonda – ambora, cumo sabemos, a estas pessonas nada, arriba de todo denheiro, les bonda! –, que pedálen an terreno praino!…
Cumo se puode ber dá para aqueilhes i estes cuntináren a gozar las cousas buonas de la bida a la custa de pagantes ricos assi cumo nós!… Nun bos parece justo?!…
I, pa lhá de la bicicleta que ne l retrato de riba se bei, inda mos deixórun spalhados i colgados aqueilhes ancumparables suportes de toda la filarada a atrabessar dun lhado a outro las rues.
Se nun fússen las andorinas a dá-le outro préstimo, quaije parecerie que, por séren mui amigos de las ties, ls respunsablhes de la EDP i de la PT eilhi les deixórun antre ls postes, de perpósito – ou, quien sabe se nun serie, pori, de perrice! –, pa serbíren de spéndidos standales de la roupa. Ye que bento nun les habie de faltar…
(Cuntina an 2- Un Cachico de la Stória d’Angueira)
António Preto Torrão. Licenciado em Filosofia (Universidade do Porto)
DESE em Administração Escolar (ESE do Porto)
Mestre em Educação – Filosofia da Educação (Universidade do Minho)
Pós-graduado em Inspeção da Educação (Universidade de Aveiro)
Professor e Presidente Conselho Diretivo/Executivo
Orientador de Projetos do DESE em Administração Escolar (ESE do Porto)
Autor de livros e artigos sobre Administração Educativa
Formador Pessoal Docente e Diretores de AE/Escolas
Inspetor e Diretor de Serviços na Delegação Regional/Área Territorial do Norte da IGE/IGEC
Sem comentários:
Enviar um comentário