(colaborador do "Memórias...e outras coisas...")
Çculpai-me por bos tener falado tantas bezes d’Angueira sin que, por çcuido ou squecimento miu, bos la tenga apersentado.
Antes de mais, deixai que bos diga un segredo: la poboaçon d’Angueira ye tan recatada que nun se deixa ber de ningun pobo al redor! Se bos ponirdes a spreitar-la doutro pobo, bezino ou mais çtante ou seia donde fur, só podereis ber parte de l termo; de la poboaçon, nun bereis mesmo nada! Ye que, de loinje, só se puode ber de ls sítios mais altos de l própio termo i, assi i todo, solo parte deilha!
Anton, se sodes de fuora i la quejirdes ber, só se furdes anté lhá!…
Chubi anté las Eiras Grandes i, de l cimo de la barreira de ls Penhones, ponei-bos, anton, a oulhar an redor. Al loinje, nun relhance d’uolhos de naciente anté norte, podeis admirar la lhina de l’hourizonte i, abaixo deilha, la bacia zenhada pula purmeira cadena de montes de l termo, al redor de la poboaçon: Cabeço Molhón, Cabeço l Cuorbo, Cruzica, l Múrio, las Eiricas i Cabeço la Binha; al fondo deilha, la ribeira i, nas sues marges, las huortas de la Cabada, de l Múrio, de la Çança, de la Salina, de la Mediana, de la Faceira de l Prado, de l Areal, de la Faceira, de las Uolmedas i de las Antraugas; a seguir, las casas de l cimo de l pobo anté Sante Cristo i algũas huortas i huortos de l Pilo, a meio de la poboaçon!
De la Cabada, passando pul Múrio, la Çanca, ls Puntones i l Areal anté la Faceira, la ribeira ye cumo ũa buolta al peito d’Angueira.
Claro que podeis inda ber – i mal serie que nó – l casariu d’Angueira: de l cimo al fondo de l pobo; l Balhe, las Scaleiricas i l Ronso; la capiellha i l Lhargo de Sante Cristo; la fuonte de l Pilo; ls huortos i huortas de l Balhe, de l Pilo, de l Cachon i de la Çança; de l cimo al fondo de Saiago, ou seia, de la capielha de San Sabastian, passando pul Lhargo de Saiago, anté al Sagrado i a la Eigreija.
Assi i todo, deilhi de riba, nun dá para berdes todo l casariu: de Sante Cristo, nun se béien las casas de la Beiga de l Casal i de la Mediana; de las casas de la Salina, de la Çanca i de l Cachon, só podeis ber ls telhados; i, de las casas de Saiago, mui ralas son las que podeis ber.
L cimo de l pobo i lhina d’hourizonte de l termo d’Angueira. De la squierda pa la dreita: Sierro de ls Malhadales ou Sierra d’Angueira, la Gralheira i l Cabeço de la Quecolha, bistos de las Eiras Grandes.
Oulhando para mais loinje, l monte de l Pandon, l Sierro de San Joanico, l Sierro de ls Malhadales, la Gralheira, l Cabeço de la Quecolha, la Chana i l alto de l Milho i de l Rodelhon fórman la sigunda cadena de montes an redor d’Angueira. Eisceto antre l monte de la Gralheira i l Cabeço de la Quecolha, donde s’abista Santa Marinha, pa lhá deilhes, nada mais déixan ber.
Cumo todo sabemos, dependendo de l punto de bista, las mesmas cousas parécen ser defrentes. Assi, cumoquiera tamien querereis ber las casas i la parte de la poboaçon que, de las Eiras Grandes, quédan scundidas.
Botai-bos, anton, anté al outro lhado de la poboação: l alto de l Múrio, l sítio donde, cumoquiera, las bistas d’Angueira séian mais guapas. Deilhi, oulhando a la squierda, de la Çanca, por antre la Salina i l Cachon, passando pula capielha de Sante Cristo pa l cimo de l pobo, podeis ber las casas ancarrapitadas pula barreira de Sante Cristo arriba i las de l cimo de l pobo çcaindo pa la Mediana; oulhando a la dreita, de la Eigreija anté la capielha de San Sabastian, podeis ber las casas dun lhado i doutro de la rue de ls Burmelheiros i de l lhargo de Saiago; oulhando pa l cimo de Saiago i acumpanhando l fondo de l monte de las Eiras Grandes, abistais las casas que, deç la capielha de San Sabastian, passando pul Ronso, ban anté meio de la chubida pa las Eiras Grandes, al lhado de l Balhe; oulhando pa l meio, antre las casas de Sante Cristo i las de Saiago, acumpanhando l ribeiro de l Balhe, deç la Çanca, pul Cachon i pul Pilo, podeis ber ls huortos i las huortas de las marges de l ribeiro anté la fuonte de l Pilo. Mas, deç l Ronso i las Scaleiricas anté al fondo de la Francosa, tanto de l lhado de Saiago cumo de l de Sante Cristo, nun podeis abistar l restro de las huortas nin algũas casas de las marges de l ribeiro de l Balhe pus quédan scundidas atrás de la barreira de Sante Cristo.
Bedes, anton, cumo la poboaçon s’acunchega nas casas ancarrapitadas de la barreira de Sante Cristo i tamien cumo se spraina pulas huortas antre Sante Cristo i Saiago.
 |
| La poboaçon d’Angueira, bista de l alto de l Múrio |
Tanto de las Eiras Grandes, a naciente, cumo de l Múrio, quaije a meio antre sul i poniente, la poboaçon d’Angueira aparece, a la frente de quien la bei, an todo l sou splandor.
A nun ser de l’aire i subre Sante Cristo, a meio de la poboaçon, nun hai niun outro sítio donde se beia Angueira toda dũa beç: de loinje, nin de l sierro de ls Malhadales, nin de la Quecolha, nin de l Piquete, nin de ls Carreirones ou mesmo de la Cruzica; de perto, nin de cabeço la Binha, nin de l alto de la Canhada, nin de las Eiras Grandes, nin de cabeço l Cuorbo, nin mesmo de l Múrio ou de las Eiricas.
Se bos amostra i quedais a ber ũa parte, podeis crer que bos sconde dues ou trés. Mas nun cuideis que ye por mal!… Nó, ye qu’eilha ye mesmo assi!
Mesmo stando yá drento deilha, andando pula poboaçon, ye cumo se tubíssemos a la nuossa frente ũa moça que, tirando mais ũa pieça de roupa, mos bai zbendando um braço, ũa pierna, ũa parte de l cuorpo de cada beç. Assi, restra siempre mais un cachico que queda scundido…
I cada qual de nós, todo tontico, a la spera de se zlhumbrar a ber-la toda znuda!…
Se calha, ye por ser assi tan recatada, que hai por alhá quien, quando la cumbersa nun le agrada, diga: “Pon-te eiqui que há des ber l castielho d’Outeiro!”
DESE em Administração Escolar (ESE do Porto)
Mestre em Educação – Filosofia da Educação (Universidade do Minho)
Pós-graduado em Inspeção da Educação (Universidade de Aveiro)
Professor e Presidente Conselho Diretivo/Executivo
Orientador de Projetos do DESE em Administração Escolar (ESE do Porto)
Autor de livros e artigos sobre Administração Educativa
Formador Pessoal Docente e Diretores de AE/Escolas
Inspetor e Diretor de Serviços na Delegação Regional/Área Territorial do Norte da IGE/IGEC
Sem comentários:
Enviar um comentário